MOS TË BËHEMI ROB TË ZAKONEVE TË DËMSHME

Feja jonë Islami na urdhëron të mbrojmë fenë, jetën, mendjen, pasurinë dhe brezin tonë.

Çdo zakon i dëmshëm që bie ndesh me fenë, që prish natyrën njerëzore, që dëmton trupin dhe shpirtin tonë, apo që korrupton brezin tonë, është i ndaluar.

Të dashur vëllezër!

Në krye të zakoneve që e mpijnë njeriun dhe e bëjnë mendjen të paaftë qëndron alkooli.

I Dërguari i Allahut (s.a.s.) ka thënë:

كُلُّ مُسْكِرٍ خَمْرٌ، وكُلُّ مُسْكِرٍ حَرامٌ

“Çdo gjë që deh është pije alkoolike dhe çdo pije e tillë është haram (e ndaluar).” (Sahih Muslim, Kitabu’l-Eshribe, 74, 2003)

Alkooli është nëna e të gjitha të këqijave. Për shkak të tij shumë familje shpërbëhen, ndodhin shumë aksidente me pasoja të rënda e me vdekje, dhe shuhen jetë e shpresa.

Për këtë arsye, prodhimi, përdorimi, blerja apo shitja e pijeve alkoolike është rreptësisht e ndaluar në fenë tonë.

Të nderuar besimtarë!

Një tjetër zakon i dëmshëm që e çon njerëzimin drejt shkatërrimit është bixhozi.

Ai shihet si një mënyrë për të fituar para lehtë, por në realitet është një fitim i padrejtë.

Kush bie në grackën e bixhozit, përfundon në vetmi, dëshpërim dhe shumë sprova të tjera.

Sipas Islamit, të gjitha format e bixhozit dhe lojërave të fatit janë haram.

Zoti i Lartësuar na urdhëron të largohemi nga alkooli dhe bixhozi, duke thënë:

اِنَّمَا يُرٖيدُ الشَّيْطَانُ اَنْ يُوقِعَ بَيْنَكُمُ الْعَدَاوَةَ وَالْبَغْضَٓاءَ فِى الْخَمْرِ وَالْمَيْسِرِ وَيَصُدَّكُمْ عَنْ ذِكْرِ اللّٰهِ وَعَنِ الصَّلٰوةِۚ فَهَلْ اَنْتُمْ مُنْتَهُونَ ﴿٩١﴾

“Shejtani dëshiron që përmes alkoolit dhe bixhozit të shtie ndër ju armiqësi dhe urrejtje, dhe t’ju pengojë nga përmendja e Allahut dhe nga namazi. A nuk do të hiqni dorë prej tyre?” (Maide, 91)

Të dashur vëllezër!

Një rrezik tjetër që është përhapur ndër të rinjtë tanë është varësia ndaj drogës dhe substancave narkotike.

Të rinjtë që janë larg dashurisë prindërore dhe ngrohtësisë familjare, shpesh për shkak të kuriozitetit apo ndikimit nga shokët, bien pre e këtyre substancave.

Me mashtrimin “nuk ndodh gjë po ta përdorësh një herë”, shumë prej tyre bien në humnerën e drogës.

Zoti i Madhërishëm thotë në Kuran:

وَلَا تُلْقُوا بِاَيْدٖيكُمْ اِلَى التَّهْلُكَةِۚۛ

“Mos e hidhni veten tuaj në rrezik me duart tuaja.” (Bekare, 195)

Prandaj, si xhami, familje, shkollë, institucione dhe shoqëri civile, le të bashkojmë forcat për të luftuar çdo lloj varësie qoftë alkooli, droga apo çdo gjë tjetër që dëmton mendjen, shëndetin dhe vullnetin e njeriut.

Të veprojmë kështu që fëmijët dhe të rinjtë tanë të mos bien në rrjetën e të këqijve dhe në vorbullën e mëkateve.

Të nderuar besimtarë!

Edhe interneti dhe rrjetet sociale, kur përdoren pa kufi dhe pa përgjegjësi, mund të kthehen në zakone të dëmshme.

Varësia digjitale që është përhapur me shpejtësi, e shkëput njeriun nga jeta reale, e bën të neglizhojë të dashurit e tij dhe ta shpërdorojë kohën e jetës.

Në disa platforma, shkelet privatësia e individit dhe familjes, përhapen gënjeshtra e shpifje, duke cënuar dinjitetin njerëzor dhe të drejtat e të tjerëve.

Të dashur vëllezër!

Të gjitha zakonet e dëmshme dhe varësitë që shkaktojnë dëme fizike e shpirtërore janë kurthe vdekjeje që i ka ngritur njeriut koha moderne.

Ruajtja e mendjes dhe brezit është e mundur vetëm duke qëndruar larg tyre.

Këto zakone, që janë kundër natyrës njerëzore, nuk sjellin kurrë qetësi as individit e as shoqërisë.

Mos harrojmë: lumturia e kësaj bote dhe e botës tjetër arrihet duke respektuar kufijtë që ka vendosur Allahu xh.sh. dhe duke u ruajtur nga çdo e keqe e ndaluar.

I Dërguari i Allahut (s.a.s.) na kujton:

نِعْمَتانِ مَغْبُونٌ فِيهِما كَثِيرٌ مِنَ النَّاسِ: الصِّحَّةُ والفَراغُ.

“Dy begati (mirësi) ka që shumë njerëz nuk i vlerësojnë si duhet: shëndeti dhe koha e lirë.” (Buhari, Kitabu’r-Rikak, 1, 6412)

Të nderuar besimtarë!

Le ta përfundojmë këtë hutbe duke kujtuar se shëndeti, mendja dhe koha janë amanete të çmuara që Allahu na ka dhuruar. Le t’i mbrojmë ato duke u larguar nga çdo zakon që na dëmton trupin, shpirtin dhe besimin tonë. Të mos bëhemi robër të alkoolit, drogës, bixhozit apo varësive moderne, por të jemi robër të Allahut, i Cili na do të pastër, të shëndetshëm dhe të përgjegjshëm. Le t’i lutemi Zotit të Madhërishëm të na forcojë në rrugën e drejtë, të na mbrojë neve, familjet dhe fëmijët tanë nga çdo zakon i dëmshëm, dhe të na dhurojë një jetë të mbushur me iman, vlera dhe dobi. Amin

Marrë nga:

Përktheu dhe përshtati: Mr. Mahmud Emini – Referent i Myftinisë së Tetovës