Realizohet me sukses aksioni i radhës për dhurim gjaku

Myftinia e BFI Tetovë, në bashkëpunim me Organizatën Komunale të Kryqit të Kuq – Tetovë dhe me mbështetjen profesionale të Qendrës së Mjekësisë Transfuzive, të premten, më 7 nëntor 2025, pas namazit të xhumasë, realizoi me sukses aksionin e radhës qytetar për dhurim të gjakut në hapësirat e Xhamisë së Mesme në fshatin Çellopek.

Ky aksion humanitar u prit me interesim dhe përkushtim nga besimtarët dhe qytetarët vullnetmirë të Çellopekut dhe rrethinës, të cilët me vetëdije dhe humanizëm kontribuuan për të ndihmuar pacientët që kanë nevojë për trajtim mjekësor.

Myftinia e Tetovës shpreh mirënjohje të veçantë për të gjithë pjesëmarrësit dhe bashkëpunëtorët: imamin e xhamisë Gafur ef. Selmani, kolegun e tij Muhamed ef. Salihi, këshillin e xhamisë dhe të gjithë dhuruesit për këtë kontribut fisnik. Lusim Allahun xh.sh. që t’i shpërblejë me të mira për këtë vepër të lartë humane.